Drie van Delmas vaar goed by Kampioen van Kampioene
Christelle Boshoff en Barney Lategan het silwer-medaljes in die enkelspelle vir beginners verower, en Mybert Visser is met brons in die mans-ope beloon.
Delmas Rolbalklub spog met verskeie spelers wat jaarlikse Kampioen van Kampioene-kompetisie van die Ekurhuleni-distrik uitgeblink het.
Tydens dié kompetisie speel al die klubkampioene van die klubs in die distrik teen mekaar vir die gesogte Kampioen van Kampioene-titel in hulle dissiplines.
Die kompetisie het vanjaar op 6 en 7 September by die rolbalbane van Heidelberg, Brackenhurst, Alberton en Edenvale plaasgevind.
Delmas se spelers wat na die Kampioen van Kampioene deurgedring het, was Mybert Visser (mans-opekampioen), Hanri Ehlers (vroue-opekampioen), Christelle Boshoff (vroue-beginnerskampioen), Barney Lategan (mans-beginnerskampioen), Dawie Bredenkamp (mans-veteranekampioen) en Suzette Botes (vroue-veteranekampioen).
Boshoff en Lategan het silwer verower, terwyl Visser ’n bronsmedalje opgeraap het.
