Sig-gestremde onnie van Secunda inspireer ander met haar boek
Kunsonderwyser Janice Rudolph skilder graag met koffie.
Janice Rudolph (49), ’n onderwyser by Hoërskool Secunda, het net 10% sig, maar dit het haar nooit gekeer om haar droom uit te leef nie.
Rudolph het in Potgietersrus grootgeword en het sedert haar geboorte beperkte sig gehad.
Sy het egter vinnig geleer om goed reg te kom sonder hulp en haar ouers het dit eers besef toe sy 12 jaar oud was.
Toe sy sewe jaar oud was, het haar dagmoeder vir haar ouers gesê sy dink Janice het ’n probleem met haar sig.
Haar ouers het haar na dieselfde oogarts waar haar jonger broer, wat net een oog gehad het nadat ’n maatjie hom per ongeluk met ’n gordynrek in sy oog geskiet het, geneem.
Dié oogarts het egter gesê hy dink Janice het net ’n leesprobleem.
Toe sy 12 was, moes sy in die klas ’n toets van die bord afskryf en Janice het net 4 uit 10 vir dié toets gekry omdat sy nie die woorde mooi kon sien nie.
“Ek het so skaam gekry,” het sy vertel.
Die onderwyser het haar ouers ingelig van die toets en hulle het Janice weer na ’n oogarts geneem wat bevestig het sy het ’n probleem met haar sig en sal, teen die tyd wat sy 16 is, heeltemal blind wees.
Sy het ’n genetiese toestand wat bekend staan as Stargardt wat ’n vorm van makulêre degenerasie is.
Totdat sy 12 jaar oud was, het Janice, as hulle in die klas hardop moet lees, uitgewerk watter stuk sy moes lees teen die tyd wat dit haar beurt is.
Dan het sy dit stadig deurgelees terwyl die ander kinders lees en gememoriseer het – wanneer dit haar beurt was om te lees het dit geklink of sy dit vlot kan doen.
Die lewe het egter makliker vir haar geword toe haar ouers en onderwysers geweet het van haar probleem, want toe het sy vraestelle geskryf wat op groter papier gedruk is en sy het ekstra tyd gekry om eksamen te skryf.
Janice het matriek klaargemaak in ’n hoofstroomskool en het selfs netbal op laerskool gespeel. In die hoërskool was sy in die geesspan en het meer op landsdiens gefokus.
LEES OOK: Firefighters extinguish burning vehicle on the P185 near Unicor Dam
Ná skool is sy na die Groenkloof Onderwys-kampus om te studeer en het eers drie maande later vir haar dosent gesê sy het eintlik ’n probleem met haar sig.
Hulle het haar toe gehelp om spesiale toerusting te kry om haar leeswerk te vergemaklik.
Janice het ná haar studies vir ’n jaar by ’n skool in Centurion gewerk en is intussentyd ook met haar man, Attie Rudolph, wat sy op universiteit ontmoet het, getroud.
Hy het toe reeds op Secunda gewoon en Rudolph het na ’n jaar by hom aangesluit en by Hoërskool Evander begin skoolhou voordat sy ’n jaar later by Hoërskool Secunda begin het.
Sy het vir 15 jaar wiskunde gegee en later wiskunde en kuns, maar dit was moeilik omdat sy dan in die een klas kwaai en streng moes wees met die kinders en in die volgende klas meer ontspanne.
Deesdae gee sy net kuns en het ook ’n kunshandboek self geskryf.
“Daar was nie kunshandboeke nie toe het ek drie jaar se notas saamgestel in boekvorm,” het sy gesê.
Janice geniet kuns en skilder self ook. Sy geniet dit veral om met koffie te skilder. Om met koffie te skilder is ’n moeiliker proses want koffie loop vinniger op die skilderdoek as gewone verf.
Sy het ook onlangs ’n boek, Veerstories, geskryf wat binnekort beskikbaar sal wees. In dié boek van 50 bladsye, vertel sy stories van haar lewe en al die illustrasies in die boek is haar eie skilderye.
Janice glo alles wat sy is en bereik het in haar lewe is net genade.
“Die Here kyk na my al van dag een af,” het sy gesê.
