Lezahn Greeff van Secunda doen tennis vir werk en ontspanning
Tennis is in haar bloed.
SECUNDA – Me. Lezahn Greeff speel al tennis vandat sy kan onthou en het besluit om dit sommer haar loopbaan te maak.
Me. Greeff se ma, me. Daleen Greeff, het destyds tennis afgerig en dit was dus vanselfsprekend dat haar dogter op die tennisbane geboer het.
Me. Greeff het op Secunda grootgeword en aan Hoërskool Secunda gematrikuleer en het ná skool eers vir ‘n jaar op Stellenbosch studeer voordat die kans om voltyds as tennisafrigter te werk, oor haar pad gekom het. Sy geniet dit om sport as ‘n werk en as ontspanning te doen.
Sy het die kans gehad om in 2015 saam met ‘n groep ander afrigters en spelers na Texas in Amerika te gaan en hul vaardighede en metodes op te skerp.
Sy is ‘n lid van die Sasol Tennisklub en haar man geniet ook dié stokperdjie saam met haar.
“Ek het hom leer tennis speel, maar nou klop hy my as ons speel,” het sy vertel.
Me. Greeff rig tans haar eerste speler wat in ‘n rolstoel is, Susan van Niekerk, ‘n 14-jarige leerder van Hoërskool Secunda, af. Sy het die Tennisvereniging in Suid-Afrika geskakel vir raad en een van dié vereniging se top rolstoelspelers, Patrick Selepe, het Secunda besoek en haar kom touwys maak.
“Ek leer nou baie van rolstoeltennis wat ek heel waarskynlik nooit sou geleer het as Susan nie oor my pad gekom het nie,” het me. Greeff vertel.
Sy is trots op haar tennisspelers en veral op Susan.
Me. Greeff bied ook ‘n tennisprogram, naamlik Tennis Whizz, aan wat spesifiek op jong tennisspelers tussen drie en ses jaar oud, fokus.
Me. Greeff is ‘n gekwalifiseerde onderwyser vir die grondslagfase en sy het ook ‘n kursus in afrigtingswetenskap voltooi en het gesê dit help haar baie om vir Susan af te rig.
“Toe ek dié kursus gedoen het in 2018 het ek nooit geweet ek sou ‘n tennisspeler kry wat in ‘n rolstoel is nie,” het me. Greeff gesê.
In haar vrye tyd ry sy graag fiets as sy nie op die tennisbaan is nie.
