ERMELO – Nege avontuurlustige seuns van Laerskool JJ van der Merwe het onlangs aan die Farm Jam se derde ronde by Zeekoeigat buite Middelburg deelgeneem.

Dié seuns het in 85 cc- en 65 cc-klasse deelgeneem en Ermelo se naam hoog gehou.

Hulle moes tydens die wedren, wat oor ’n tydperk van twee ure plaasgevind het, soveel moontlik rondes van 10 km gery het.

Sowat 23 seuns het in die 85 cc-klas deelgeneem. Stiaan van den Heever het die eerste plek behaal en WJ Cronje was vyfde.

Stiaan het ook die trofee vir die “hole shot” ontvang. Dit word aan die ryer wat eerste tydens die wegspring deur is na die buiteveld, toegeken.

Beide Stiaan en WJ het elk ses rondes in die gegewe tyd voltooi.

Paulis van Niekerk was goed op dreef en was tussen die top vyf deelnemers, maar het in die derde ronde geval en moes van die wedren onttrek.

Die volgende seuns het almal vyf rondes voltooi en die onderskeie plekke behaal; Trompie van den Heever (sewende), Willem Jacobsz (10de), WP Human (11de) en Jabbies Jacobsz (18de).

Dit was Willem en Jabbies Jacobsz se eerste wedren gewees.

FD Lotz en Gustav van Niekerk het in die 65 cc-klas deelgeneem, waarin daar 24 seuns ingeskryf het.

Lotz het ’n vyfde plek behaal en Van Niekerk, wat ook aan sy eerste resies deelgeneem het, het ’n 21ste plek behaal.

Die volgende Farm Jam sal op 25 September plaasvind.