Die jaarlikse Boer en Britdag het op 11 April op die kleinste dorpie in Suid-Afrika, Val, plaasgevind. Daar was hope pret en vermaak vir oud en jonk.

Buiten die stalletjies wat heerlike kos en drinkgoed verkoop het, kon mense die skyngeveg tussen die ‘Boere’ en ‘Britte’, wat sowat 6km buite Val plaasgevind het, kyk.

’n Opvoering van hoe die gebeure van die destydse ‘Whisky-trein’-voorval op 29 Desember 1900 afgespeel het, is uitgebeeld.

Boere het destyds ’n Britse goedere-trein wat alkohol vervoer het, laat ontspoor nadat hulle ’n bom op die treinspoor geplant het.

Die boere het toe die Britse soldate genooi om saam met hulle die buit wat op die trein was, te geniet.

Verder kon mense ook ’n praatjie deur Professor Fransjohan Pretorius oor Emily Hobhouse geniet, asook ’n K9 hondevertoning en ’n kompetisie vir die bes geklede Boer en die bes geklede Brit.