Jan en Cathy van Niekerk bereik op 3 September ’n besondere mylpaal wanneer hulle hul 70ste huweliksherdenking vier.

Volgens een van hul vyf kinders, Anthon, is die egpaar steeds so verlief soos op die dag in 1955 toe hulle in Bloemfontein in die huwelik bevestig is. Hulle is ’n voorbeeld van twee mense wat saam deur lief en leed gegaan het en in hul gryse ouderdom steeds die romanse van hul liefde behou.

“Hulle is ongelooflik dankbaar vir onverdiende goedheid en guns uit die Vader se hand, en dat hulle gespaar is om dié herdenking te kan beleef,” sê Anthon.

Jan (91) geniet woordsoek-raaisels in tydskrifte en koerante, werk graag met sy hande en braai elke naweek ’n vleisie. Cathy (88) is lief vir lees, naaldwerk en kosmaak, en is boonop steeds ’n kranige bakster.

“Hulle hele lewe spreek van liefde vir mekaar, vir hul kinders, kleinkinders, agterkleinkinders, familie, vriende en naaste,” sê Anthon.

Jan is in November 1933 in Dealesville as die agtste kind van die gesin gebore. Hy en sy jonger broer, Petrus, wat saam met sy vrou Sannetjie in Bloemfontein woon, is die enigste oorlewende kinders van die gesin.

Cathy is in Desember 1936 in Wepener gebore as die oudste dogter. Sy het drie susters gehad, waarvan twee reeds oorlede is. Die ander suster, Doreen, woon saam met haar man Fritz in Bloemfontein.

Die egpaar het vyf kinders, twee aangetroude dogters en een aangetroude seun. Hulle het agt kleinkinders, waarvan ses getroud is, en nege agterkleinkinders.

Hulle sien daarna uit om hul platinum-herdenking in Kroonstad, omring deur familie en vriende, te vier.