Die lewenselikser vloei weer by Immergroen
Niks meer water probleme by Immergroen Aftreeoord nie.
Soos die groot Leonardo da Vinci eenkeer gesê het, “Water is die dryfkrag van die hele natuur”.
Vir die inwoners van Immergroen Aftreeoord is dit die dryfveer van hul nuutgevonde geluk.
Na ’n lang gesukkel met munisipale waterprobleme het die gemeenskap bymekaargekom om ’n boorgat te sink, en nou is die soet geluid van vloeiende water musiek in hul ore.
Niks meer swaar houers op- en afsleep of bekommerd wees oor droë krane nie.
Die boorgat is op Vrydag, 26 Julie gesink en is geskenk, met watertenks, pompe en loodgieterswerk op Saterdag, 24 Augustus.
Die amptelike inwyding het op Donderdag, 12 September plaasgevind.
Water, die uiteindelike lewegewer, het die gemeenskap saamgebring ter viering.
Terwyl Pieter Boshoff almal hartlik verwelkom het, het Danie Cronje se openingsgebed en Bybelvers die toon aangegee vir ’n heerlike dag.
En wat is ’n fees sonder heerlike versnaperinge en sjampanje?
Die nuwe boorgat, mildelik geskenk deur FKN Army in samewerking met verskeie maatskapye in eMalahleni, asook al die inwoners van Immergroen, het vreugde en verligting vir die ou mensies gebring.
Annatjie Lange, die inwoner met ’n hart van goud, het die saak beywer.
’n Spesiale woord van dank is gerig aan Daniel en Zelda Victor, met Pieter Boshoff wat gesê het, “Hopelik sal ons nog ’n lang pad saam stap, nie in probleme nie, maar in vriendskap.”
Die dae dat die inwoners bekommerd moes wees dat hulle nie water het om te drink nie, is in die verlede, met Annatjie wat uitgeroep het, “Ons kan nou water reguit uit die krane uit drink!”
Het jy ’n storie om te vertel?
Stuur vir ons ’n epos na info@witbanknews.co.za of bel ons by 013 656 2490
- Vir meer brekende- en gemeenskapsnuus, besoek gerus ons webtuiste: www.witbanknews.co.za
- Jy kan ons ook volg op sosiale media platforms: Facebook, Twitter of Instagram
