Die gebruik van nasionale paaie, veral die N12 snelweg, is veronderstel om veilig en gemakliker te wees wanneer jy van een plek na ʼn ander wil reis.

Dis juis hoekom ons die agterpaaie vermy, maar dit wil blyk dat boewe nou een stap te vȇr gaan en motoriste teiken wat veral in stil tye van die nag soos slange in die gras lȇ en wag.

Daar word beweer dat ʼn slagoffer om en by 01:00 in die oggend in die vinnige laan van die N12 gery het toe hy sonder kans om uit te swaai, ʼn groot klip met sy regtervoorwiel getref het.

Die beweerde rooftog het gebeur toe die man vanaf Johannesburg na Springs oppad was.

Met geen ander keuse as om te stop en die wiel te vervang nie, het daar vier onbekende gewapende mans op hom afgestorm.

Dit word beweer dat dit nou die nuutste modus operandi is van boewe, veral op stil tye van die nag of dag.

Die beweerde rowers het gevlug met ʼn slimfoon, skootrekenaar, horlosie en kontant.

Die slagoffer was gelukkig nie aangerand nie.

Volgens die SAPS-webtuiste is daar ʼn paar wenke oor wat om te doen en nie te doen in geval u uself in so ʼn situasie bevind:

Doen alles wat die oortreders sȇ.

Probeer ten alle tye om u trots, waardigheid en selfrespek te behou.

Probeer om kop te hou oor belangrike informasie soos tye, ligging, plekke en name.

Probeer om koel en kalm te bly.

Indien moontlik, val plat op die grond tydens die rooftog.

Moet nie histeries of paniekerig voorkom nie.

Moet geen weerstand bied nie.

Aggressie is nie in jou beste belange nie, bly kalm.

Moet nie probeer om ʼn held te wees nie.

Deel jou nuusbrokkies met ons per Telefoon: 013 656 2490 Epos: info@witbanknews.co.za of volg ons op sosiale media platforms Instagram Twitter Witbank News App Facebook page Witbank News Breaking