Ranties verwelkom voornemende Rakkers en Graad Eens by Ekspo
Besoekers kon hulle vergewis van al die sport- en kultuurkodes wat by die skool aangebied word.
Met die reuk van gebraaide boerewors in die lug en vrolike musiek in die agtergrond, het Laerskool Randhart met groot afwagting na die voornemende Rakkers en Graad Eens van 2023 by die Ekspo uitgesien.
Die kleuters en hul ouers is entoesiasties verwelkom.
Besoekers kon hulle vergewis van al die sport- en kultuurkodes wat by die skool aangebied word. Eksterne vennote van Laerskool Randhart het stalletjies beman, sodat ouers ’n geheelprentjie kon kry van wat die skool aanbied.
By sommige stalletjies kon die kleuters aan aktiwiteite deelneem om hul vaardighede op die proef te stel, wat ingesluit het doelgooi, tennisballe slaan, ’n abstrakte kunswerk te skilder of om hulle langasems uit te toets.
Gaste kon die skoolterrein, Graad Een-klaskamers, mediasentrum en die rekenaarsentrum verken.
Daarna het hulle weggelê aan sappige boereworsrolle wat deur die Ondersteunersklub verskaf is.
Die skoolhoof, Marlene Gerber, kon nie uitgepraat raak oor die energie van die besoekers tydens hierdie spesiale geleentheid nie. Sy is in haar noppies met die voornemende Rakkers en Graad Een’s wat in 2023 by die Rantiefamilie gaan aansluit.
