Voornemende leerders geniet 'n oggend by Ories
Dit was 'n gewoel van 'n ander aard toe kleingoed hul eerste besoek aan Laerskool Orion gebring het om meer oor die skool te leer.
Dit was ‘n groot leerskool! Van ‘n hartlike ontvangs by die hek, tot onderwysers wat talle nuuskierige vrae oor allerlei onderwerpe moes antwoord, ‘n ietsie meer oor sport en sommer net lekker aktiwiteite het die Orie-gees laat seëvier.
Die toekomstige Orie leerders het met ywer deelgeneem, talle vrae gevra en vinnig tuis gevoel in hul nuwe omgewing.
“Laerskool Orion wil graag ons opregte dank en waardering uitspreek teenoor elke ouer, leerder en besoeker wat ons opedag bygewoon het,” het Danny Lats, verantwoordelik vir bemarking by die skool gesê.
“Dit was vir ons ’n voorreg om ons skool, ons waardes en die hart van die Ories met julle te deel. Ons vertrou dat elke gesin met ’n positiewe indruk en ’n warm gevoel weggestap het, met die wete dat Laerskool Orion ’n plek is waar elke kind raakgesien word, waarde het, en die geleentheid kry om in sy of haar eie reg ’n ware Orie-ster te word.
“By die Ories glo ons daaraan om nie net akademies te groei nie, maar ook om kinders te help ontwikkel tot selfversekerde, gelukkige en gebalanseerde jongmense met groot drome en sterk waardes.
“Dankie dat julle deel geword het van ons Orie-gees. Ons sien uit daarna om saam met julle die toekoms te bou.”
