Gemeenskap bedroef na maatskaplike werker se afsterwe
Karen was vir jare 'n maatskaplike werker by Kosmos, waar sy diep spore getrap het.
Die gemeenskap is in rou gedompel na die afsterwe van Karen Meyer, ‘n maatskaplike werker by Kosmos Aftree-Oord op 29 Januarie.
Meyer is oorlede aan pulmonale fibrose.
Sy het 1995 by Kosmos begin werk en was vanaf 1998 provinsiale direkteur vir Gauteng by Age in Action totdat sy in 2010 terug is by Kosmos.
Voorheen was sy ook ‘n maatskaplike werker by Sterlitzia Dienssentrum.
Volgens Susan Cilliers, hoof uitvoerende beampte van Kosmos, laat Meyer se afsterwe ‘n groot leemte.
“Dit is ‘n skok vir ons. Die bejaardes en personeel gaan haar vreeslik mis.
“Karen was betroubaar en goed in haar werk. Sy was ‘n rustige, kalm mens.
“Sy het aktiwiteite vir bejaardes gereël, het berading gedoen en was deel van Kosmos se bestuur,” het Cilliers vertel.
Volgens een van Kosmos se inwoners, Yvonne Pohl, was Meyer altyd behulpsaam tenoor die inwoners.
“Sy was baie gewild. Ek het gedien op Kosmos se inwonerskommitee en het altyd met haar gepraat as ons klagtes ontvang het. Karen het my ook regtig bygestaan met my wolprojek. Ons inwoners gaan haar baie mis.”
Meyer se man, Frik, het vertel sy was ‘n mense mens wat ander bo haarself gestel het.
“Sy het op ‘n stadium ‘n projek gehad waar sy kos aan behoeftiges uitgedeel het. Karen het omgegee en baklei vir bejaardes.”
Sy laat haar man, seun en broer agter.
Daar gaan on 10:00 op 3 Februarie’n roudiens vir Meyer by Kosmos gehou word.
LEES OOK: Bernina Boksburg bring vreugde aan senior burgers
LEES OOK: Baanbreker Voortrekkers maak harte oop teenoor ouetehuis
