Ondersteuningsraad wil mense dié winter weer help

Die organisasie het verlede jaar vir die eerste keer die jas-projek aangepak en dit was ‘n sukses.

“Baie van die mense wat onder ons vlerk is, is haweloos, en dit is nie vir hulle moontlik om hul besittings, soos ‘n warm kombers, die hele tyd op te pas of saam met hulle te dra nie,” het Mona Loubcher, hulp maatskaplikewerker van die Ondersteuningsraad, gesê.

“Ons wil kyk of ons vanjaar weer eerder warm baadjies, maar veral jasse, onder die mense kan verspei,”

“Die mense kan die kledingstuk gedurende die dag, wanneer dit koud is aanhou, en snags ook daarmee slaap.

”Natuurlik kan ons nie die projek sonder die hulp van die publiek aanpak nie, en ons vra baie mooi dat die mense van die dorp ons sal ondersteun.

Loubcher het gesê dat mans- en vrouejasse baie welkom sal wees, maar ook kleiner jassies wat geskik sal wees vir kinders.

“Die publiek wat dalk nie ‘n jas het om te skenk nie, maar steeds ‘n bydrae wil maak, is welkom om ‘n kontantskenking te maak; dit sal ons in staat stel om jasse vir ‘n goedkoper prys by verskaffers aan te koop,” het sy bygevoeg.

Skenkings sal tot 25 Junie ontvang word, waarna die personeel van die Ondersteuningsraad die jasse aan mense wat dit nodig het, sal oorhandig.

“Mense wat dalk nie ‘n jas of warm baadjie het om te skenk nie is natuurlik steeds welkom om warm sokkies, klere, mussies, handskoene of komberse te skenk,” het Loubcher gesê.