Die Laerskool Brakpan-Oos het die afgelope naweek sy 90ste bestaansjaar saam met die gemeenskap gevier met ’n feesviering op Saterdag, gevolg deur ’n spesiale kerkdiens Sondagaand in die skoolsaal.

Die Kapperjolle Fees het gesorg vir ’n dag vol pret en vermaak, met verskeie stalletjies, heerlike eet- en drinkgoed, asook ’n spesiale opvoering deur die leerders.

Die skool se ryk geskiedenis is ook vereer toe ‘n oud-leerder van die skool, Eldrick Mynhardt ’n waardevolle historiese item aan die skool se argief geskenk het.

Hy het sy Graad Sewe-afskeidboekie uit 1969 aan die skoolhoof, William Daniels oorhandig.

“Ons was verstom om hierdie kosbare stukkie geskiedenis te ontvang en is ongelooflik dankbaar dat hy gekies het om dit met ons Oosies-familie te deel,” het skoolhoof William Daniels gesê.