Local news

Eenjarige metgesel steel die kollig by Hoërskool Stoffberg se matriekafskeid

Die matriekafskeid was vir Billy van Zyl ‘n hoogtepunt van sy skoolloopbaan en hy is bly da thy sussie deel daarvan gemaak het.

Brenthurst inwoner, Billy van Zyl het die kollig vir ’n oomblik gesteel by die Hoërskool Stoffberg se matriekafskeid, wat onlangs plaasgevind het, toe hy met ’n besonder oulike metgesel, wat skaars ’n paar bakstene hoog is, opgedaag het.

Sy metgesel was inderdaad só klein dat hy haar sommer in sy arms kon dra.

In haar kleurvolle valletjiesrokkie het sy eenjarige sussie, Leoné van Zyl, behoorlik harte laat smelt terwyl sy self al die aandag geniet het.

Billy vertel dat hy aanvanklik nie ’n metgesel vir sy matriekafskeid gehad het nie en dat sy gesin met die idee vorendag gekom het dat hy maar sy sussie moes saamneem.


‘n Spesiale rokkie is vir Leoné van Zyl gemaak en sy was baie tuis op die rooi tapyt. Foto: Sunet Claasen Photography

Daar is vir haar ’n pragtige rokkie in reënboogkleure gemaak en sy “date” vir die aand was in plek.

“Ek het intussen wel ’n metgesel gekry, maar tog besluit om my sussie steeds deel van die spesiale aand te maak,” het Billy gesê.

Hul ma, Vanessa, het vertel dat Leoné baie lief is vir aandag en dat sy haarself gate uit geniet het.

Billy en sy metgesel, Daniella Mathee, het saam na die geleentheid, wat by Thabong gehou is, gery, met klein Leoné wat nuuskierig by die motorvensters uitgeloer het.

Met hul aankoms het Billy eers met Leoné op sy heup uitgeklim om, soos die gebruik by matriekafskeide is, op die rooi tapyt te verskyn.


Billy van Zyl en Daniella Mathee het die matriekafskeid saam geniet. Foto: Sunet Claasen Photography

“Leoné het heeltyd rondgekyk en ek kon sien dat sy in haar noppies was,” het Billy vertel.

Nadat hy sy sussie vir hul ma gegee het, het hy Daniella op die rooi tapyt vergestel voordat hulle die matriekafskeid saam geniet het. Oor die afskeid self het Billy net goeie woorde gehad.

“Dit was werklik ’n puik funksie met soveel verrassings. Alles was perfek, van die atmosfeer tot die toesprake en die kos. Dit was beslis ’n hoogtepunt van my skoolloopbaan,” het hy gesê.

“En boonop sal ek en my sussie altyd mooi foto’s hê om na terug te kyk.”


OOK LEES: Brakpan VLU sluit jaar af met verkiesing, prysuitdeling

OOK LEES: Brakpan’s finest shines at Ekurhuleni Readers’ Choice Awards

At Caxton, every story is written by humans. We use AI only to perform quality checks - never to generate the news. Happy reading!

Support local journalism

Add The Citizen as a preferred source to see more from Brakpan Herald in Google News and Top Stories.

Thelma Koorts

Thelma Koorts is an editor with a passion for delivering high-quality editorial services that meet the evolving needs of readers and clients. She currently serves as the editor for the Brakpan Herald, Springs Advertiser, African Reporter, and Heidelberg Nigel Heraut. With over 30 years of experience in journalism, her goal is to keep readers informed and updated through informative news from the community to the community.

Related Articles

Back to top button