Burgerlike Beskerming bring hoop en hulp op een van Nigel se koudste dae
Talle mense het nader gestaan om gebruik te maak van die vrygewigheid van die vrywilligers.
Te midde van een van die koudste dae wat Nigel dié jaar beleef het, het die Burgerlike Beskermingseenheid hul gemeenskapsharte warm gehou deur warm sop en klere aan behoeftige inwoners uit te deel.
Met ysige winde en dalende temperature op 10 Junie, het vrywilligers hande gevat om hulp te bied aan dié wat die koue die ergste voel. Van warm sop tot klere – hul gebare van omgee en ondersteuning het vir talle inwoners in die Nigel-omgewing troos en verligting gebring.
“Hierdie is meer as net sop, dit is ’n boodskap van hoop vir ons gemeenskap. Niemand moet alleen sukkel in die koue nie,” het een van die vrywilligers gesê, wat verkies het om anoniem te bly.
Die inisiatief, wat jaarliks tydens die winter aangebied word, is ’n bewys van hoe gemeenskapsamewerking ’n werklike verskil kan maak.
