Die Hoër Volkskool Heidelberg se Volkies en Vriende-fees, wat op 30 Oktober by die skool plaasgevind het, was ’n groot sukses.

“Die Volkies en Vriende-fees was alles en nóg meer as waarop ons gehoop het. Die atmosfeer was vol energie, die kos was heerlik, die musiek en vermaak op die verhoog was uit die boonste rakke en die feesgees was sommer tasbaar!” lui ’n plasing op die skool se Facebook-blad.

Dit was ’n aand waar vriende saamgekuier, families herinneringe gemaak het en feesgangers die feestelikheid behoorlik geniet het.

Die feesprogram het ’n indrukwekkende verskeidenheid kunstenaars ingesluit, met Die Heuwels Fantasties, Toks en Tjops, Arno Jordaan en Juan Boucher wat opgetree het, asook die Rowers Boere-Orkes.

Die musiekfees is deur goeie ondersteuning gekenmerk en het ook ’n waardevolle bydrae tot die skool gelewer.