Monnas sit Durbaniete ore aan
Monnas se eerstes maak Krugersdorp trots na 'n stewige oorwinning oor Glenwood High.
Glenwood High se eersterugbyspan moes stert tussen die bene terug Durban toe nadat Hoërskool Monument hulle met 30-19 in ‘n kragmeting op Monnas se tuisveld afgestof het.
Net voor die wedstryd wat deel uitgemaak het van die Mutual & Federal Premier Interskolestryd was daar ‘n hoendervleis-oomblik toe Monnas-leerlinge ‘n massiewe banier met die skoolwapen op die veld gedra het.
Monnas-oudleerlinge en rugbygeeste het vroeg reeds langs die veld begin stelling inneem vir die groot wedstryd wat regstreeks op SuperSport kanaal 210 gebeeldsend is.
Monnas het reg aan die begin van die wedstryd ‘n verdoelde drie afgestaan maar het die leisels vinnig vasgevat toe die kaptein en flank Gavin Delport oor die doellyn gebars het.
Losskakel Wikus van Biljon se skopskoen het die drie verdoel. Die telling het na twee strafskoppe tot 13-7 opgeskuif.
Glenwood het teruggeveg en Monnas verras met ‘n vinnige drie voor halftyd sodat daar slegs ‘n verskil van een punt tussen die twee spanne was.
Twee verdere drieë deur binnesenter Ernst Beumer en agtsteman Juan Lemmer, en ‘n skepskop deur skrumskakel Stefan Fitzgerald het Monnas in die tweede helfte gemaklik met 18 punte laat verloop.
Dit was ‘n geval van te min te laat toe Glenwood net voor die eindfluitjie ‘n troosdrie gedruk het.
