Munisipaliteit se woord-blaps
Kennisgewingsborde van Mogale City Plaaslike Munisipaliteit in Featherbrooke skep 'n nuwe Afrikaanse woord.
Moeinie rommel strooi nie.
Nee dit is nie ‘n news-joernalis wat te lui was om sy woordeboek nader te trek om seker te maak hoe die woord ‘moenie’ gespel word nie.
Dié spelfout verskyn op verskeie Mogale City Plaaslike Munisipaliteit-kennisgewingborde in Featherbrooke naby Silverstar Casino, wat die publiek maan om nie rommel te strooi nie.
‘n Groot kennisgewingbord op die hoek van Fallsweg en nog kleiner kennisgewingsborde straataf en in die omgewing basuin dié blaps uit.
Al word mense in Engels, Afrikaans en Zulu gevra word om nie rommel te strooi nie, was dit duidelik dat sommiges hulle nie daaraan steur nie.
Rommel in verskillende vorms en groottes – selfs vragmotorbande – het voor die kennisgewingborde rondgelê.
Die vraag is nou of die munisipaliteit die oortreders sal beboet indien hulle op heterdaad betrap sou word waar hulle rommel strooi.
