Die geur van meer as 20 pruttende potjies het die lug by Hoërskool Bastion in Mindalore gevul.
Danksy die bereidwilligheid van die Graad 11-ouers en Petru van Zyl (Graadhoof) was die eerste Kas-Pot-Pretdag so suksesvol dat daar besluit is om dit ‘n jaarlikse instelling te maak.
Doreen Smith, een van die ouers wat by die organisering van die dag betrokke was, sê die sukses kon groter gewees het as die stormsterkwind nie die mense weggehou het nie.
“Afgesien daarvan is die dag steeds goed bygewoon en almal is gelukkig met vol mae huis toe.”
Daar was ‘n vlooimark, ‘n verskeidenheid kosstalletjies en ‘n koffietuin.
‘n Kaskarresies, gereël deur die Graad 11-leerlinge, is deur die dag gehou waartydens die verskillende klasse in Graad-verband met mekaar gekompeteer het.
Elke klas moes kyk hoeveel keer hulle in tien minute met hulle kaskar, wat hulle self moes bou, om die baan kon jaag.
Die vyf wenklasse van elke Graad het daarna dertig minute elk gekry om te kyk wie die vinnigste en meeste kere om die baan kon jaag.
Smith sê die ouers en onderwysers het ook met mekaar probeer kragte meet, “maar die onderwysers het ons laat skaam kry.”
Hier is die wenners van die potjiekoskompetisie:
• Die neefs Johnny en Hein White het met die kroon weggestap
• Riaan en sy vrou Jennifer van Rensburg het die tweede plek gehaal
• Oud Bastion-leerling Adriaan van Blerk het die derde plek verower
Verwante artikels:
• Groot pret by jaarlikse kerkbasaar
