Opgelei om ander te help
Graad 7-leerling ontvang sertifikaat in kardiopulminêre resussitasie.
Die 13-jarige tiener Casey-Leigh van der Walt sal voortaan lewens kan red. Sy hoop om nog mense te kry wat in haar voetspore sal volg.
Dié Graad 7-leerling van Laerskool Kenmare het onlangs haar kwalifikasie in kardiopulminêre resussitasie (KPR) ontvang van Bee Well, ‘n instelling wat deur die Ressusitasie Raad van Suider-Afrika erken word.
Die kursus is ses uur lank en met harde werk en deursettingsvermoë is sy die jongste gekwalifiseerde van Bee Well wat haar sertifikaat ontvang het, wat tot Oktober 2016 geldig is.
Casey-Leigh het gesê sy is baie trots op haar sertifikaat en is gereed om mense in nood te help.
Haar ma Susan het gesê sy het haar dogter vir die kursus gestuur omdat sy voel dit is noodsaaklik dat selfs kinders gekwalifiseerd moet wees.
“Sy sal eendag haar gesin of selfs haar skoolmaats in tye van ‘n nood kan help deur KPR toe te pas totdat die mediese personeel opdaag.”
Sy sê sy hoop nog leerlinge en veral matrikulante sal in haar voetspore volg.
“Vir matrikulante is dit ‘n uitstekende kwalifikasie om in hulle curriculum vitae in te sluit.”
