Meer-Min Shaw vier 80ste in pienk
Die gospelsanger Min Shaw het haar 80ste verjaardag onlangs in Krugersdorp saam met ander vermaaklikheidspersoonlikhede kom vier.
Vir Min Shaw se 80ste verjaardagpartytjie by Hollywood Costumes, het die bekende gospelsanger kompleet soos ‘n meermin in haar pienk rok gelyk.
Die meer as 100 gaste wat spesiaal haar verjaardagviering bygewoon het, sluit vermaaklikheidspersoonlikhede soos Chris Chameleon, Manie Jackson, die musiekgroep Beeskraal, Barbara Ray, Gert van Tonder en Jody Wayne in.
Die countrysanger Lance James het van sy gunsteling treffers vir haar gesing voordat hy terug Kaapstad toe is vir ‘n optrede.
Die aktrise Lizz Meiring het as gasvrou opgetree terwyl Min se jarelange musiekpromotors Boet Pretorius, André Viljoen, Lydia Winchester en Dirk Swanepoel ook daar was om haar spesiale dag saam met haar te vier.
“Dit was vir my ‘n lekker verrassing. Ek kan vir seker sê dit was ‘n baie lieflike oggend wat ek saam met vriende deurgebring het,” het Min gesê.
Die gaste is gevra om iets pienk by hulle uitrustings aan te trek omdat dit Min se gunsteling kleur is. Die lokaal waar haar partytjie gehou is, was ook met pienk versier.
“Vandat ek ‘n klein dogtertjie was, was pienk maar my gunsteling. Ek hou ook van pers,” het sy vinnig bygevoeg.
Heidi du Toit, eienaar van Hollywood Costumes het gesê dit is vanjaar al die 15de jaar wat hulle vir Min ‘n verjaardagpartytjie reël.
Japie Gouws, die besturende direkteur van die Afrikaanse Taal- en Kultuurvereniging-groep (ATKV) het Min geprys omdat sy vir soveel jare die Afrikaanse kultuurskat help verryk het.
Sy het die Afrikaanse taal en kultuur oor ‘n tydperk van meer as 50 jaar help bevorder.
Min het gesê dat haar verjaardagvieringe nog ver van verby is omdat sy en haar naastes ‘n klein geselligheid by haar huis in Roodepoort beplan het.
“Dit is vir my baie lekker om my verjaardag saam met al my vriende en geliefdes te kan vier.”
Op die vraag oor hoe dit voel om 80 te wees, het sy bloot gesê, “Ek kan vir jou sê ek voel steeds wonderlik. As jy van ‘n jong ouderdom af na jou liggaam kyk dan sal jou liggaam na jou kyk wanneer jy ouer word.”
Verwante artikels:
• ‘n Gedaanteverwisseling met kostuums
