Hunter eet, slaap en drink musiek

Country aanhangers let op; daar is ‘n nuwe sanger wat besig is om sy naam groot te maak.

Met twee CD’s reeds onder sy naam, sien Hunter uit na ‘n blink toekoms. Hunter het sy eerste CD drie jaar gelede vrygestel, en sy nuutste een is sopas beskikbaar gestel.

“My groot droom is om eendag in Texas op te tree,” sê Hunter met sterre in sy oë.

Hy vertel aan die News dat hy sy verhoog naam aangepas het omdat hy na internasionale herkenning in die musiekbedryf strewe.

“Al is ek Afrikaans, sing ek meestal in Engels. Ek glo ek balanseer dit,” gesels hy.

Nadat een van die lede van die Afrikaanse groep DJ Ossewa verongeluk het, het Hunter sy hart gevolg en ‘n oudisie vir die group afgelê en homself voltyds as ‘n musikant begin bemark.

“Ek het nooit geweet dat ek kon sing nie.”

Nadat hy vir twee jaar klank ingenieurswese geswot het, het hy in verskeie DJ Ossewa musiekvideo’s verskyn en ook toe ‘n beter insig van die bedryf ontwikkel.

“In die oudisie het Piet Pompies vir my gesê dat ek ‘n goeie stem het, en het net daar begin aan my talent en droom bou.”

Maar hierdie 25-jarige opkommende sanger se lewe draai nie net om musiek nie, of doen dit?

In sy spaartyd werk hy tans daaraan om ‘n ateljee by sy huis op te rig wat sal dien om ander jong opkommende kunstenaars ‘n hupstoot te gee.

Hunter het ook onlangs aan sy eie liedere begin skryf en sien daarna uit om dié in die toekoms op te neem.

Met verskeie toere deur die land, wat Natal en die Noord-Kaap insluit, sien Hunter daarna uit om binnekort weer in Krugersdorp op te tree.

Country aanhangers kan vir Hunter binnekort by HTS Nic Diederichs op die verhoog op 22 Mei sien.

Gaan ‘like’ vir Hunter op Facebook of kontak hom by 076 684 3854.