[VIDEOS]: Meisie hou kop na inbreker blinde oupa met karbattery bydam
Sy het net gehoor 'Grrrr... Eish...Grrr...Eish, Eish!' soos haar oupa die inbreker beetkry.
‘n Tien-jarige meisie is haar blinde grootouers se heldin nadat sy kop gehou het tydens ‘n inbraak waartydens haar oupa met ‘n karbattery beseer is.
Chris Boshoff, 66, wat met tonnelvisie sukkel, vee kort-kort oor sy opgeswelde regteroog nadat ‘n inbreker sy kop Saterdagoggend net na 2vm met ‘n karbattery, wat as ‘n alternatiewe kragbron vir lig tydens beurtkrag gebruik word, oopgekloof het.
Die egpaar se dogter Louise van Staden, wat haar pa se hand vashou waar hulle in die sitkamer sit, het gesê dokters vermoed dat dit moontlik die nagevolg van koptrauma is ná die harde slag teen haar pa se kop en dat geen skedelbreuk gelukkig opgedoen is nie.
Haar blinde ma Roelien, 65, het eerste van ‘n geraas wakker geword en het aanvanklik gedink dit is haar jongste seun Roelof wat na ‘n laat kuieraand teruggekeer het.
“Sy het bly sy naam roep, maar het geen antwoord van hom afgekry nie. Dit is toe dat sy opstaan om ondersoek in te stel, want sy het dit baie vreemd gevind dat hy haar nie terug antwoord nie,” het Louise gesê.
By die kombuis het Roelien weer na haar seun geroep en toe sy geen antwoord kry nie het sy toe gevra: “Wat maak jy?”
Die inbreker antwoord toe ewe arrogant in Afrikaans terug “Huh! Wat dink jy?”
Chris vertel dat sy vrou terug na hulle slaapkamer is on hom wakker te maak.
“Ek het onmiddellik wakker geskrik en die skokstok saam met my geneem. Toe ek by die kombuis inkom het ek gehoor daar is iemand by die venster en dit is toe dat hy op my afpyl waarna ek hom begin skok het.”
Louise lag en het gesê haar dogtertjie Nastaché wat daar oorgeslaap het, het saam met haar ouma weggekruip waar sy gehelp het om hulp oor hulle Gemeenskapspolisiëringsforum (GPF) radio te ontbied.
“Sy het net gehoor ‘Grrrr… Eish…Grrr…Eish, Eish!’ soos haar oupa hom beetkry.”
Chris het gesê hy het gesien dat die inbreker moontlik iets in sy hand het, maar omdat sy oë te swak is kon hy nie vasstel wat dit is nie.
“Hy was daarna nie meer lus om iets te steel nie, want ek het hom goed gebraai. Hy het op die kombuistafel gespring om te vlug en het die karbattery van die tafel gegryp en my daarmee teen die kop gegooi.”
Hy het gesê al waaraan hy die heeltyd kon dink is dat hy nie verby hom gaan kom nie omdat sy kleindogter by hulle kuier.
Louise het gesê toe haar dogter en ma hoor dit is stiller het hulle gaan kyk of haar pa nog veilig is.
“Dit was vir haar verskriklik om haar oupa bebloed te sien en te hoor dat hy huil en te weet hy het seergekry. Sy was die heeltyd eers sterk en kalm gewees – sy het gehelp handdoeke aandra om die bloeding te stop,” het Louise gesê.
Verwante artikel: Man wat drie koeëlskote oorleef op herstelpad
“Sy het eers begin huil toe die GPF, polisie en sekuriteitsmaatskappye by die huis opgedaag het; toe trek die skok haar eers.”
Louise het self gehuil toe sy praat oor hoe traumaties dit vir haar was toe sy die oproep kry.
“Dit is ‘n nare gevoel om daardie nuus te ontvang. Eintlik kon dit so gewees het dat ek my pa se begrafnis kon beplan het, of nog erger ook my ma en kind s’n.”
Krugersdorp Polisie bevestig die voorval en het gesê dat die inbreker en ‘n medepligtige aangekeer is.
Sou jy graag nuusflitse via WhatsApp wil ontvang? Stuur ‘n SMS/ WhatsApp boodskap met jou naam en selfoonnommer na 079 435 3799.
Maak seker dat U kennis neem van ons WhatsApp-vrywaring
Het jy dalk meer inligting rakende dié storie? Stuur gerus vir ons ‘n e-pos na krugersdorpnews@caxton.co.za of skakel ons by 011 955 1130.
Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes Randfontein Herald, Roodepoort Record en Get It Joburg West Magazine
Besoek ook ons Facebook, Twitter en Instagram blaaie om jou stem te laat tel!
