‘n Groep inwoners van die Panorama Landgoed Aftreeoord in Krugersdorp het onlangs ‘n klankryke en kleurvolle Paasopvoering op die planke gebring.
Die oord se eie Sang-ensemble het vir hulle Paasopvoering hande gevat met Hoërskool Monument se Musieksentrum. Paasmusiek het ‘n nuwe baadjie aangetrek met ‘n kombinasie van ou en moderne klanke.
‘n Lofdansgroep, waarvan al die dansers bo 70 was, was ook ‘n belewenis. Hul mimiek by die Kruistoneel het menige toeskouer laat trane afvee. Die hoogtepunt van die opvoering was die bediening van die nagmaal.
Ds Jannie Pelser en die Panorama Welwillendheidsgroep het op dié manier gesorg vir ‘n innige herdenking van die dood van Jesus. Jannie het egter beklemtoon dat die Kruis nie die einde is nie, maar wel die begin van ‘n nuwe lewe.
“Ek is besonder trots op die verskillende aktiwiteite waarby die lede in die oord betrokke is,” het die bestuurder van die oord, Amanda Venter gesê.
‘n Inwoner het aan die News vertel dat Amanda ‘n groot inspirasie vir die bejaardes is en dat sy hulle altyd aanmoedig om so aktief as moontlik te wees.
“Sy hou niks van stoepsit vir bejaardes nie,” het sy laggend gesê.
Die Panorama Sang-ensemble hoop om in Oktober weer hul vrolike Lentekonsert aan te bied waaraan hulle reg deur die winter flink sal oefen.
Lees verder:
Poeding hou 95-jarige springlewendig
Fees gehou om 20 jaar se bestaan te vier
[FOTO’s] Pret ken g’n ouderdom
