Met tydlose Kersliedere, ‘n kreatiewe Kersboom en sakke vol bederfies – só het Laerskool Kenmare (Kennies) dankie gesê vir die afgelope jaar se guns en seëninge.
Dié dankseggingsdiens het op Woensdag, 7 November by die skool plaasgevind waar ‘n aantal bejaardes van Môreglans Ouetehuis by hul aangesluit het.
Volgens projekbestuurder, Hermine Lourens reik hulle met elke jaar se diens graag uit na verskillende instansies.
Die geskenkpakkies het onder andere bekers, koffie, koekies, waslappe en sepies bevat. Die bejaardes was vreeslik opgewonde toe dié pakkies deur pragtige haasbek-engeltjies aan hulle oorhandig is.
Hulle is ook vermaak deur oulike paddabeentjies wat ‘n prettige Ouma-en-Oupadans opgedis het, en ook deur Deané Swiegelaar en Jodie Hougaard wat ‘n hartroerende lied gesing het.
Pastoor Morné Venter van Ignite the Fire in Christ Fellowship het boonop gesorg vir ‘n inspirerende boodskap om die spesiale geleentheid mee af te sluit.
Na die diens is ‘n groep Graad 1’s na die tehuis geneem om nog pakkies, drukkies en glimlagge uit te deel. Die bejaardes het vertel dat Kennies beslis weer ‘n bietjie glans na Môreglans gebring het, en bedank hulle graag daarvoor.
Kyk hier na die Ouma-en-Oupadans:
Het jy dalk meer inligting rakende dié storie? Stuur gerus vir ons ‘n e-pos na krugersdorpnews@caxton.co.za of skakel ons by 011 955 1130.
Vir daaglikse gratis gemeenskapsnuus aan die Wes-Rand, besoek ook ons susterwebtuistes:
Besoek ook ons Facebook, Twitter en Instagram blaaie om jou stem te laat tel!
