Na ‘n maand van voorbereiding hier by die News as deel van ‘n nasionale Caxton Cares-projek, is Nasionale Boekweek uiteindelik hier.
As deel van die News se poging om meer mense toegang tot leesstof te gee, is talle skole genader om te help.
Laerskool Krugersdorp-Noord het die uitdaging aangegryp. Hul leerders en ouers is gevra om hul harte oop te maak en soveel moontlik tweedehandse boeke in te samel. Alle verwagtinge is gou oortref, en binne ‘n week is meer as ‘n duisend boeke in verskillende genres ingesamel.
“Ons het net ‘n brief uitgestuur en vir die ouers gevra of hulle sal help. Die Graad 7’s is ingespan en het elke dag bokse vol boeke van die klasse af aangedra,” het juffrou Jacqueline Kruger verduidelik.
Sy het ook genoem dat ‘n onderwyser saam met ‘n klompie vriende ‘n bakkie vol boeke ingesamel het en skool toe gebring het.
