Vrouemaand word só gevier
Aktrise Lizz Meiring het 35 jaar in die bedryf saam met Vrouemaand gevier tydens die Bethany House-fondsinsameling by Ekudeni Country Lodge. Sy het heelwat te sê gehad oor vrouwees.
Die bekende en geliefde Lizz Meiring het weereens ‘n draai aan die Wes-Rand gemaak, dié slag om ‘n saal vol suksesvolle vroue te vermaak.
Hierdie byeenkoms het om 9.30vm op Saterdag, 17 Augustus begin met ‘n goeie geselssessie tussen vriende en ‘n smullekker vingerete. Dit was deel van die viering van Vrouemaand.
“Die dag het natuurlik ruim voorsiening gemaak vir gesellige kuier om deftige teetafels, en om die vrouwees-lekkerte verder aan te vul het Vriende van die Bethany House Trust weer die Resale Royalty-winkel aangebied met ‘n verskeidenheid gesogte en bekoorlike items wat goedvoel voed,” het Marina Hough van Bethany House verduidelik.
Lizz het die dag gesels oor haar wedervaringe oor die 35 jaar wat sy in die toneel- en televisiebedryf is.
“Sy het vertel van die woelinge en waansin, die tragedies en triomfe, die chaos en kreatiwiteit, beroemdes en berugte en die vreugdes en vertwyfelings van ‘n lewe as aktrise,” het Marina gesê.
Verder het sy raad gegee oor vrouwees in vandag se lewe, en hoe om nie net te oorleef nie, maar te streef na meer. Sy het wenke oor alledaagse goed gegee, soos om sakkies vol water in nuwe skoene te sit en dit dan in die vrieskas te plaas. Die skoene rek namate die water vries en uitsit.
Die hoofdoel was natuurlik om geld in te samel vir Bethany House, en die dag was in hierdie opsig ook duidelik ‘n sukses. Bethany House kan ook met hul bedrywighede voortgaan aangesien hul las beslis ligter gemaak is.
