EPR Sekuriteit aan die Wes-Rand het hul misdaadverslag vir 28 en 29 Augustus bekendgemaak.

“Oor die algemeen was daar nie ‘n toename in insidente in Mogale City oor die naweek in vergelyking met die vorige week nie,” het Johan Krogh, hoofbestuurder van EPR Sekuriteit aan die Wes-Rand gesê.

Hy het wel bygevoeg dat dit lyk of onwettige myners (zama-zamas) meer aktief begin raak het en hulself tot ander tipes misdaad in die Boltonia-omgewing gewend het.

Twee gevalle van gesinsgeweld is aangemeld en die polisie is ingeroep, terwyl daar ook een geval van intimidasie aangemeld is en die oortreder uit ‘n winkel verwyder is.

Krogh het gewaarsku dat besighede wat naby aan onwettige mynbedrywighede geleë is, waaksaam moet wees.