Na ‘n ellelange vakansie was daar nie een Noordskool-onderwyser, -leerder of hul ouers wat nie bly was dat die eerste skooldag uiteindelik aangebreek het nie.

Alhoewel daar hier en daar leerders was wat onseker en hartseer was, veral van die heel kleintjies, was alles gou vergete nadat hulle afskeid geneem het en by die skoolhek ingestap het. Leerders is na hul nuwe klasse toe waar hulle hul nuwe onderwysers beter leer ken het, en nuwe maats begin maak het.

Noordskool se Graad 1’s het reeds in Desember vir ‘n dag lank die skool saam met hul ouers gaan verken, gevolglik was hulle op hul gemak toe hulle op die eerste skooldag op Maandag, 15 Februarie in hul nuwe klaskamers begin skoolgaan het.

Charles Miller, Laerskool Krugersdorp-Noord se hoof het verduidelik, “Leerders is in twee groepe per klas verdeel, en kom elke tweede dag skool toe. Die resultaat is ‘n maksimum van 10 tot 16 leerders per klas.

Met die aangepaste leerplanne sal ons die kurrikulum voltooi. Noordskool stap natuurlik altyd die ekstra myl om te sorg dat daar ekstra werk vir verryking en remediëring sal wees.”

Soos verlede jaar sal die laer grade in een klas bly terwyl die onderwysers elke periode klasse wissel, en die senior laerskoolleerders sal soos gewoonlik klasse wissel.