Suid-Afrika se geskiedenis is op een merkwaardige Woensdag, 140 jaar gelede, drasties en vir ewig net hier in Krugersdorp verander.

Ons land het vir ‘n tydperk sedert 1852 sy onafhanklikheid aan die Britte prysgegee. Op 8 Desember 1880 het Suid-Afrikaanse burgers egter ‘n massavergadering teen ‘n heuwel gehou wat vandag as Paardekraalrylaan bekend staan. Daartydens is besluit om die Suid-Afrikaanse Republiek weer tot ‘n onafhanklike staat te verklaar. Hierdie besluit het dae later tot die Eerste Anglo-Boere Oorlog gelei.

‘n Plaaslike boer het die grond waar daardie byeenkoms in 1886 gehou is, aan die staat geskenk, en in 1891 is ‘n obelisk van wit klip op dié terrein opgerig ter nagedagtenis aan dié gebeurtenis.

“Die monument is van groot geskiedkundige waarde vir die dorp, en vir Afrikaans,” het AfriForum Krugersdorp-buurtwag se voorsitter Martin Lombard gesê.

Martin en die AfriForum Krugersdorp-span het, met die hulp van die Paardekraal Feeskomitee, die Federasie van Afrikaanse Kultuurvereniginge (FAK), GP Lawnmowers, Genius Landini Tarlton en Tree Men, op Saterdag, 20 Februarie die groot taak aangepak om die monumentterrein se gras te sny en skoon te maak.

“Daar moet na die monument gekyk word. Wanneer die monumentterrein opgeruim en onderhou word, skep dit ‘n positiewe gevoel in die hele dorp.

“AfriForum Krugersdorp is nou 18 maande aan die gang en het opgelet hoe sommige areas agteruit gaan. Ons het geweet ons moet iets daaromtrent doen,” het Martin verduidelik, en bygevoeg dat dit deel vorm van hul #OnsSalSelf-veldtog om die gemeenskap se algehele voorkoms te verbeter.