Na die verwoestende onluste in die land het Suid-Afrikaners net weereens bewys dat hulle kan saamstaan wanneer dit saak maak.

AfriForum Krugersdorp wil ook graag hul deel doen om die landsburgers wat sukkel na die onluste by te staan en daarom het hulle besluit om hande te vat met Solidariteit Helpende Hand en ‘n noodboksprojek te loods.

Daar is twee maniere waarop inwoners betrokke kan raak by die projek. Die eerste is om fondse te skenk deur ‘n betaling te doen in die AfriForum-bankrekening (besonderhede is op AfriForum Krugersdorp se Facebook-blad).

Die ander manier hoe jy kan help is om ‘n noodboks te pak en dit by een van die afleweringspunte te gaan aflaai. Die bokse moet geseël wees omdat hulle ontsmet moet word. Die basiese benodighede moet in ‘n boks wees en sal nie los aanvaar word nie.

Jy kan die boks vul met mieliemeel, koekmeel, rys, hawermout, kookolie, gis, langlewemelk/ melkpoeier, sout, tee, suiker, energiestafies, toiletpapier, bleikmiddel/ saniteerder, seep, babadoeke en blikkieskos soos gebakte boontjies in tamatiesous, vis, Weense worsies en boeliebief.

Hierdie noodbokse kan by enige van die volgende plekke afgelaai word:

• Batterystraat 1 in Wentworthpark van Maandae tot Vrydae tussen 14:00 en 17:00, of op Saterdae tussen 10:00 en 14:00
• Die AfriForum Krugersdorp-kantore bo die poskantoor in 4de Straat van Maandae tot Vrydae tussen 14:00 en 17:00