Vir baie jare was Jaco Harmse die persoon tot wie die gemeenskap hulle gewend het as hulle hulp nodig gehad het. Op 5 Februarie, presies ses jaar na sy oupa se skielike dood, is hy van sy familie af weggeruk.

Lia, met wie Jaco nagenoeg ses jaar getroud was, het vertel dat hy sy gemeenskap as sy eie familie beskou het en selfs in die vroeë oggendure oproepe sou beantwoord as iemand hulp nodig gehad het.

Jaco was 41 en het in Carletonville grootgeword. Hy het aan Hoërskool Jan de Klerk gematrikuleer, waarna een van sy onderwysers hom gevra het of hy in die apteek wou gaan werk.

Daar het hy verlief geraak op sy werk en op die mense. Hy het in die 22 jaar in net drie apteke gewerk waarvan die afgelope ses jaar by Rant-en-Dal Apteek was.

Sy vrou het vertel dat Romeine 14:7 hom as mens die beste opsom.

Niemand van ons leef tog vir homself nie, en niemand sterf vir homself nie”.

Lia het vertel Jaco en sy oupa dikwels saam visgevang het. Na sy oupa se dood het hy begin gholf speel en hy het dit net so geniet soos om tyd langs die viswater deur te bring.

“Hy is oral waar ek gaan; ek sien hom in alles,” het Lia vertel

Jaco word oorleef deur Lia, sy ma, pa en sussie, asook die paartjie se drie hondekinders. Sy vriende, kollegas en die gemeenskap is saam met sy naasbestaandes in rou gedompel.

Hy los ‘n legacy,” het Lia gesê.

Jaco se gedenkdiens word op Vrydag, 18 Februarie gehou. Die diens vind om 14:00 by die Môrester Kampterrein plaas, en Lia het gesê dat enigiemand wat vir Jaco geken en liefgehad het, welkom is om die diens by te woon.