Hoërskool Bastion kon op Woensdag, 9 Februarie vir die eerste keer in drie jaar ‘n behoorlike atletiekbyeenkoms aanbied.

Topatlete van Hoërskool Riebeeckrand en Allen Glen High School is genooi om aan die vriendskaplike byeenkoms op Hoërskool Bastion se sportgronde deel te neem.

“Ons het baie daarna uitgesien dat die atlete weer kon kragte meet. Buiten Covid wat ons vir die afgelope paar jaar verhinder het om so ‘n byeenkoms aan te bied, was die weer ook ‘n faktor,” het byeenkomsorganiseerder Quintus Writes vertel.

Die atlete oefen so hard, en as ons weer sien word die byeenkomste uitgestel of afgestel as gevolg van reën. Ons is dus baie dankbaar dat die weer saamgespeel het. Die atlete het uiteindelik die geleentheid gehad om hul vaardighede en talente op die proef te stel.”

Die top drie atlete van elke skool kon deelneem aan items soos 80m, 150m, 300m, 600m, hoogspring, verspring, diskus, spiesgooi en gewigstoot.

“Baie dankie aan elkeen wat bygedra het tot die sukses van die byeenkoms. Dit was vir ons vreeslik lekker om die gaste en atlete by die skool te verwelkom en ons hoop om hulle gou weer te sien. Ons as personeel, bestuur en beheerliggaam is ongelooflik trots op elkeen van die atlete wat alles gegee het. Ons wens hulle ook sterkte toe met die res van die atletiekseisoen,” het Quintus ten slotte vertel.