Die leerders van Krugersdorp-Noord het in die verlede elke jaar op Hemelvaartdag kerk toe gestap, maar hierdie jaar kon hulle nie. Daarom het hulle hul Hemelvaartdiens op ‘n spesiale manier by die skool gehou.

Op Donderdag, 26 Mei het al die leerders en onderwysers op die pawiljoene geluister na die mooi boodskap wat dominee Jorina Redelinghuys van die NG Krugersdorp-Noord gemeente gebring het. Sy het twee pienk balonne saamgebring en vir die kinders vertel hoekom Jesus moes Hemel toe gaan.

Sy het verduidelik dat net soos die balonne wat opstyg wanneer jy hulle laat gaan, het Jesus ook Hemel toe gegaan om vir elkeen van hulle ‘n spesiale plek te gaan regmaak. Maar namate die ballon se helium minder word, kom dit weer terug aarde toe. So sal Jesus ook eendag terugkom om hulle te kom haal.

Daarna het die hele skool saam ‘n lied gesing waaraan hulle die hele week geoefen het. Toe het die KISS-dansgroep opgetree.

Die dag is afgesluit met twee verteenwoordigers van elke graad, asook die skoolhoof wat twee wit duiwe losgelaat het.

Dit was beslis ‘n baie spesiale Hemelvaartdag.