Laerskool Kenmare het op Saterdag, 11 Junie hul jaarlikse Kennie Fees aangebied en ‘n ieder en ‘n elk sal saamstem dat dit weereens ‘n fees in die ware sin van die woord was.

Die hekke is reeds omstreeks 10:00 vir die publiek oopgegooi en daar was gou bykans nie plek vir ‘n muis rondom die verhoog op die sportveld nie. Feesgangers is getrakteer met ‘n wye verskeidenheid lekkernye en kon by talle stalletjies rondsnuffel waar van byderwetse vellies tot henna-tatoes gesmous is. Maar die witwarm kunstenaars was die groot trekpleister. Germandt Geldenhuys, Lee Scott, Brendan Peyper en Demi Lee het die hande laat klap en die voete laat wikkel.

“Meer as 6 000 mense het dié suksesvolle fees bygewoon. Veral vir die inwoners was dit heerlik om weer ‘n bietjie saam te kom en lekker te kuier na Covid,” het Peter du Toit, die skool se woordvoerder na afloop van die fees gesê.

‘n Stewige bedrag is ingesamel wat weer aangewend sal word vir verskeie welsynsprojekte wat onder meer ‘n voedingskema insluit,” het Peter gesê.