‘n Familie van Wentworthpark het onlangs letterlik met ‘n slag wakker geword toe ‘n bestuurder beheer oor sy voertuig verloor het en deur hul muur gebars het.

Tinus Pelzer, die huiseienaar wat lid is van die Sektor 4 Gemeenskapspolisiëringsforum het vertel dat hy en sy familie op Sondag 26 Junie teen 06:00 nog vas aan die slaap was toe die slae hulle laat wakker skrik het.

Hy vermoed dat die man baie vinnig met sy groen Volkswagen Polo gery het toe die voertuig eers die middelman getref en toe bo-oor ‘n dubbelbaan gery het voordat dit deur sy grensmuur gebars en in sy erf tot stilstand gekom het.

Sy heel eerste gedagte toe hy die slae hoor was dat ‘n kar gerol het.

Gelukkig was daar geen beserings nie, maar die voertuig het vier panele van sy betonmuur met die stutpale uit die grond gery. Sy hekmotor is ook beskadig. Dit gaan vir Tinus R5 600 uit die sak jaag om die muur te herstel, dan kom die nagenoeg R8 000 by wat nodig is vir die hekmotor.

Tinus het vertel dat daar ‘n paar jaar gelede ook iemand in sy hek vasgery het en dat hy toe reeds gevra het dat spoedkalmeermaatreëls in Mainreefweg en Johan Jonkerrylaan aangebring word.