Kennie Fees 2024 ‘n ‘belewenis’
Duisende inwoners het onlangs na Laerskool Kenmare gestroom vir vanjaar se Kennie Fees.
Die jaarlikse Kennie Fees op Saterdag, 1 Junie was ‘n reuse sukses.
Volgens die skoolhoof van Laerskool Kenmare, Wouter Immelman, hou hulle elke jaar dié fees en vanjaar was daar na raming amper 3 000 mense wat opgedaag het.
“Omdat Laerskool Kenmare vanjaar 50 jaar oud is, het ons vir die fees ‘n groep Kennie VIP’s genooi. Dit sluit in oud-skoolhoofde, personeel [wat langer as 35 jaar aan diens was] asook leerders wat in 1974 by ons op skool was. Die fondse wat ingesamel was, word aan die skool geskenk,” het Wouter bygevoeg.
Oud-onderwyser Bridget Ferreria (wat van 1976 tot 2019 by Kennies skoolgegee het) het gesê die fees was ongelooflik lekker.
“Dit was baie emosioneel tog lekker om almal weer te sien,” het Bridget bygevoeg.
Wouter het verder verduidelik die gees en samesyn was iets om te beleef en dat dit ook ‘n guldige geleentheid was vir die gemeenskap om bymekaar te kom.
Die Krugersdorp News het die fees bygewoon, waar daar ‘n hele rugbyveld vol mense was, wat met opgewondenheid gewag het vir die kunstenaars om op te tree. Dit sluit in Bernice West, Appel en die hoofkunstenaars Spoegwolf. Daar was ook ‘n verskeidenheid aktiwiteite soos toutrek en springkastele. Dit het wel geblyk dat die besigste deel die van die fees die biertent was.
Tydens Spoegwolf se optrede is die omliggende area van die verhoof afgebaken. Hoofsanger Danie du Toit het afgespring om die versperring te breek, sodat honderde aanhangers teen die verhoog kon staan ??en hul gunsteling sanggroep sien.
“Ek het vreeslik uitgesien. Dit was ‘n vreeslike intieme en uitstekende gehoor by Kenmare,” het Danie na die tyd gesê.
Op Sondagoggend het Kennies die 50-jaar feesvieringe vir die naweek afgesluit met ‘n gebedsdiens wat die gemeenskap ook kon bywoon.
