’n Laerskool Protearif-leerder, Mika-Juls Harber, het dit haar missie gemaak om energie en vreugde na die inwoners van Moria Ouetehuis te bring.

Mika-Juls, ’n graad 6-leerder, dans al sedert sy vier jaar oud is en voel soos ’n vis in die water op die verhoog. Sy het opgemerk dat baie oumas en oupas nie altyd die kans kry om kinders se optredes by te woon nie, en het daarom besluit om vir hulle te wys wat sy gaan doen tydens die Suid-Afrikaanse All Style Dance Association-kampioenskappe in Polokwane op 18 Oktober.

Op 10 Oktober het sy ’n spesiale dansvertoning vir die tehuis se inwoners aangebied.

Haar ma, Shanelle Harber, sê Mika-Juls het al in verskeie eisteddfods en kultuurkompetisies uitgeblink.

“Vanjaar het sy selfs haar eerste treë in die vermaakbedryf gegee deur in advertensies te verskyn,” het sy bygevoeg.

Mika-Juls se droom is om haar liefde vir dans en drama na die groter verhoog en skerm te neem, en eendag ’n beroep soos maatskaplike werk te volg om met mense te werk.