Jong atlete jaag drome by Krugersdorp Kampioenskappe
Met sowat 700 atlete in aksie was die Krugersdorp Kampioenskappe allesbehalwe speletjies, en die top presteerders mik nou vir die Gauteng-Wes-kampioenskappe en selfs die Suid-Afrikaanse spanne.
Die dorp se opkomende laerskool-atlete het hul spykerskoene aangetrek en hulself deeglik voorberei vir die Krugersdorp Kampioenskappe.
Van Mullies tot Kennies en Nories het 54 skole aan die atletiekbyeenkoms op 12 Februarie deelgeneem, wat op Hoërskool Noordheuwel se astroveld aangebied is.
Volgens die organiseerder van die kampioenskappe, Quintin Botha, het skole van regoor die dorp deelgeneem en sal die topatlete deurdring na die Gauteng-Wes-kampioenskappe. Ongeveer 700 atlete het deelgeneem, en Botha het gesê die dag was nie grappies nie, en die kompetisie was uiters sterk.
Hy het verder beklemtoon dat dit vir hom veral opmerklik was om die samehorigheid tussen die skole te sien. Botha het afgesluit deur te sê dat dit die beste kompetisie in die Wes-Rand is en dat van die deelnemers selfs by die Suid-Afrikaanse kampioenskappe verteenwoordig kan word.
Die uitslae sal bekend gemaak word sodra alles bevestig is – hou hierdie ruimte dop!
