Ongelukkig beland ’n mens se beste vriend soms in haglike omstandighede, maar die 9th Day Animal Rescue Centre is daar om hierdie viervoetiges te red en nuwe hoop te bied.

Hierdie nie-winsgewende organisasie het dit hul missie gemaak om nie net ondervoede en mishandelde diere te red en te rehabiliteer nie, maar, volgens stigter Charmaine Pieterse, om ook sterilisasies en veeartsenykundige sorg in minderbevoorregte gemeenskappe aan te bied. Hulle wy hul tyd daaraan toe om aan hierdie diere te bewys dat daar steeds mense is wat vir hulle omgee.

“Een van ons mees onlangse reddings is ’n hondjie wat met motorolie besmeer is om na bewering ’n veltoestand te ‘behandel’. Die olie het sy vel gebrand, sy pels het grootliks uitgeval, sy liggaam is uitgeteer, en sy vel is pynlik blootgestel. Hy benodig dringend spesiale antibiotika-rome, sonskerm, voedsame kos, komberse en warmte om te herstel – veral met die winter wat voorlê,” vertel Pieterse.

“Ons red die vergete, genees die gebrokenes en is lief vir die ongeliefdes. Al ons diere word ingeënt, ontwurm, gemikroskyf, en gesteriliseer,” voeg sy by.

Die sentrum versorg tans ongeveer 110 honde, waarvan die meeste grootrasse is met uiteenlopende agtergronde. Hulle word op die perseel wat die organisasie huur, versorg. Die hondehokke benodig egter deurlopend instandhouding, wat ernstige finansiële druk veroorsaak.

“’n Klein groepie vrywilligers kom naweke help met opruim, spandeer tyd saam met die diere, herstel hondehokke, en help selfs met tuinmaak – insluitend gras sny – sodat die honde meer spasie het om rond te hardloop. Selfs met hierdie hulp kan ons egter net soveel doen,” sê Pieterse.

“Al verhoog ons daagliks bewustheid op sosiale media en doen ons ’n beroep op die publiek vir skenkings, bly die veeartsrekening groei en staan tans op sowat R70 000. Ons het selfs ’n BackaBuddy-bladsy begin om fondse in te samel. Die maandelikse lopende kostes hoop op, en ons het dringend hulp nodig,” beklemtoon sy.

Vir enige bystand kan die volgende skakel besoek word: [https://www.backabuddy.co.za/campaign/9th-day-animal-rescue-centre].

Die organisasie mik daarna om fondse in te samel om 50 permanente hondehokke te bou, elk teen R8 000. Donasies vir die volgende is ook van groot waarde:

• kos
• bosluis-, vlooi- en ontwurmingsmiddels
• komberse en truie vir die winter
• skoonmaakmiddels (harke, buitebesems, emmers, handskoene, swartsakke)
• tuinmaaktoerusting (soos ’n petrolgrassnyer en petrolonkruidvreter)
• leibande vir staptye met die honde

Benaderde maandelikse uitgawes sluit die volgende in:

• R8 500 – Huur
• R59 000 – Salarisse
• R49 000 – Kos
• R2 000 – Vullisdromhuur
• R8 000 – Elektrisiteit
• R20 000 – Verbandterugbetaling op die plaas

Lees ook : Diere eerste: DBV vier sukses ná fondsinsameling in Tarlton

Hierdie uitgawes sluit nie petrol, skoonmaakmiddels, bosluis- en vlooibestuur, ontwurmingsmiddels, veeartsrekeninge en ander daaglikse kostes in nie.

“Enige hulp vir hierdie weerlose diere maak dit moontlik vir ons om hulle die beste sorg te bied. Ons waardeer dit opreg indien u oor hierdie wesenlike saak kan berig,” sluit Pieterse af.

Vir verdere navrae kan Tammy, wat die vrywilligersgroep koördineer, by 079 654 8141 gekontak word.