Een van Krugersdorp se oudste inwoners, Koekie Snyman, vier vandag, 18 Maart, haar 100ste verjaarsdag.

Tannie Koekie is in 1926 gebore en woon tans in die Memorial-woonstelle in die middestad. Die Krugersdorp News het verlede jaar verslag gedoen oor haar 99ste verjaarsdag, waartydens sy haar geheim gedeel het vir ’n lang en gelukkige lewe.

“Jy moet na jouself omsien en gesond bly. Wees aktief en moenie te veel medisyne gebruik nie; maar die belangrikste is om jou medemens te help en na hulle uit te reik,” het sy vertel.

Ongelukkig het Tannie Koekie op 16 Maart ’n beroerte gehad. Haar seun, Stanley Peterson, het vertel dat sy in die Leratong-hospitaal opgeneem is, maar dat dit op haar verjaarsdag beter met haar gaan as toe sy opgeneem is.

“Sy is baie bekend in die dorp, en almal hou duim vas en bid vir haar vinnige herstel en terugkeer huis toe,” het hy afgesluit.

Lees ook: Leer hoe om ’n Spekboom maklik te plant en kweek