‘n Vloed en ernstige dakskade het ‘n sopkombuis in Krugersdorp-Wes genoop om tydelik te sluit, maar die kombuis is onlangs weer heropen.

Die We’re Against Starvation (WAS)-stigting se missie is om honger mense met waardigheid te voed. Op 8 April het hul sopkombuis weer sy deure geopen nadat herstelwerk aan die gang was.

Die organisasie voorsien daagliks maaltye aan sowat 180 tot 200 kinders in die oggend en bedien ongeveer 350 ander mense in die middag.

Lees ook: Hoe om ’n bergkaree te plant: Maklike stap vir stap gids vir jou tuin

Die stigter, Esmarelda van Zyl, het verduidelik dat hulle op die eerste dag van die nuwe skoolkwartaal weer oopgemaak het om kinders voor skool van ontbyt en kosblikke te voorsien. Die oggend het reeds vroeg begin, en altesaam 195 kosblikkies is uitgedeel.

“Ons was vir die hele vakansie gesluit terwyl ‘n kontrakteur besig was om die eetsaal se dak te verwyder en nuwe dakplate op te sit. Die dak is nog nie heeltemal voltooi nie, maar ons kon nie langer gesluit bly nie, omdat ons nie wou hê dat die kinders van die gemeenskap sonder kosblikkies skool toe moes gaan nie,” het sy gesê.

Die span het reeds vanaf 05:00 begin om broodjies te smeer, en die kospotte was al vroeg op die stoof om voedsame middagetes voor te berei.

“Die kinders was baie opgewonde oor die nuwe seisoen by ons sopkombuis. Volwassenes en bejaardes het spontaan hulp aangebied, hetsy deur groente te skil of bloot om deel te wees van die warm en vrolike atmosfeer,” het sy bygevoeg.

Daar is 120 bakkies pap uitgedeel, 195 kosblikkies vir kinders voorsien, en ‘n totaal van 365 borde gekookte etes vir middagete uitgedeel.

“Ons besef daar lê nog ’n lang pad voor. Hoewel ’n gedeelte van die eetsaal se dak reeds vervang is, moet die res van die sopkombuis se dak nog gedoen word. Tog glo ons vas dat ons dit met die ondersteuning en gebede van ons gemeenskap sal kan voltooi. Ons bly dankbaar vir elke persoon wat deel is van hierdie reis en help om ’n verskil te maak in ander se lewens,” het sy afgesluit.