Inwoners het onlangs heelwat vliegaktiwiteit in die Delporton-lugruim opgemerk, maar dit was alles vir ’n goeie doel.

Die rede daarvoor was die jaarlikse vlug vir kinders, oftewel The Children’s Flight, wat op 8 Mei by die Jack Taylor-vliegveld plaasgevind het.

Volgens organiseerder Felix Gosher is die doel van die geleentheid om minderbevoorregte kinders wat nog nooit tevore gevlieg het nie, die geleentheid te gee om dié ervaring te beleef. Verskeie organisasies het die dag bygewoon, insluitend 52 kinderhuise van regoor die land.

LEES OOK: Husband’s underwear prank leaves wife speechless

“Ons wil die gemeenskap ophef met ’n dag soos dié, almal bymekaarbring en ’n verskil in die kinders se lewens maak,” het hy verduidelik.

Hy het verder vertel dat altesaam 500 kinders vir die eerste keer in ’n vliegtuig kon klim en die wolke invaar. Vir hom was die hoogtepunt om te sien hoe die kinders die ervaring geniet het.

“’n Mens onthou veral die kinders se glimlagte en hoe die ervaring nuwe moontlikhede in hul gedagtes oopmaak,” het hy gesê.

“Die dag was die onvertelde liefdesverhaal tussen vlieëniers en kinders.”

Nog ’n organisasie wat genooi is, was die Wesrandse Skool. Die skool se onderhoof, Freddie Jordaan, het gesê dit was ’n wonderlike voorreg en geleentheid vir die kinders.

“Die kinders was ongelooflik opgewonde om vir die eerste keer te vlieg. Hulle is ook bederf met kos, geskenkpakkies en vermaak, waarvoor ons baie dankbaar is,” het hy bygevoeg.

Een van die vlieëniers wat aan die dag deelgeneem het, Dieter Böck, het gesê die dag was ’n wonderlike ervaring.

“Wanneer die kinders opgewonde raak, raak ons sommer ook opgewonde,” het hy afgesluit.