Winterskool bring Kersgees na Krugersdorp
Die VLU Fuchsia-tak se jaarlikse Winterskool het weer kinders én volwassenes bymekaar gebring vir ’n dag vol kreatiwiteit en Kersgees.
Kersfees het vanjaar vroeg aangebreek vir die Vrouelandbou-unie (VLU) se Fuchsia-tak tydens hul jaarlikse Winterskool.
Die Winterskool het op 15 Julie by die AGS Krugersdorp-Sentraal se kerksaal plaasgevind. Die tak se voorsitter, Lena Lombard, het gesê hulle bied die Winterskool al tussen 10 en 15 jaar aan. Vanjaar se tema was Kersfees in Julie.
“Die doel daarvan is om kinders te bemagtig en hulle nuwe vaardighede aan te leer. Deur die jare het volwassenes ook begin aansluit,” het sy gesê.
Ongeveer 35 mense het die Winterskool bygewoon. Volgens Lombard was daar verskeie aktiwiteite vir alle ouderdomsgroepe, wat gewissel het van die maak van Kerskranse tot ander kreatiewe handwerkprojekte.
“Ons sien altyd uit na dié dag. Dit is een van ons grootste dae van die jaar,” het sy afgesluit.
