Vir Hekpoort-inwoner Duncan Hindle is elke boom ’n bewys van wat met ’n bietjie geduld uit ’n klein saadjie kan groei.

Duncan, ’n lid van die Wieg van die Mensdom-tak van die Dendrologiese Vereniging van Suid-Afrika, het die afgelope vyf jaar ’n passie vir plantvoortplanting ontwikkel. Hy versamel gereeld sade van bome wat hy teëkom en kweek dit self.

“As ek sommer verby ’n boom loop met sade aan, vat ek sommer ’n paar van die sade en groei dit.”

Volgens Duncan kan dit ongeveer twee jaar neem om ’n boom uit ’n saad te kweek, maar die wag is deel van die genot.

Hy glo hy het reeds meer as 100 bome geplant wat hy self uit sade gekweek het en moedig ander aan om dieselfde te doen – veral met inheemse bome.