Met Braaidag, oftewel Erfenisdag, vandag, deel Johan Swanepoel (66), beter bekend as ‘Oom Johnny’, sy dekades se braai-ervaring en wenke vir die perfekte vuur.

Oom Johnny se passie vir braai strek veel verder as die gemiddelde Sondagmiddag se vuurtjie. Hy braai omtrent vyf keer per week en beskou Braaidag as ’n geleentheid om te ontspan, goeie kos te maak en saam met mense te kuier.

“Om te braai is vir my vreeslik lekker en ’n maklike manier om kos te maak. Die reuk van ’n tjoppie op die vuur is briljant, veral ná ’n lang dag,” sê hy.

Hy verkies ’n vuur van sekelbos en glo hout gee vleis ’n beter smaak as houtskool. Sy gunstelinge op die rooster is skaaptjops, ribbetjies en boerewors, terwyl steak soms ook op die spyskaart verskyn – alles natuurlik saam met ’n braaibroodjie.

Wanneer dit by skaapvleis kom, hou hy die voorbereiding eenvoudig, met net suurlemoensap en Aromat. Volgens hom moet skaapvleis stadig oor ’n matige vuur gaargemaak word om dit sappig en sag te hou.

Vir Oom Johnny is die beste deel van ’n braai egter eenvoudig: goeie geselskap, ’n lekker vuur en ’n koue bier.