Groot oë en glimlagte vir graad 1’s van Noordskool
Die rooi tapyt is Dinsdag, 10 Januarie letterlik vir Laerskool Krugersdorp-Noord se nuwe groep graadeentjie-paddabeentjies van 2023 en hul ouers uitgerol.
Grootskool kan soms bietjie intimiderend wees, maar dit is beslis nie vir die nuwe graad 1’s van Laerskool Krugersdorp-Noord nie.
‘n Dag voordat die res van die skool ook terugkeer om die nuwe skooljaar aan te pak het die graad 1’s en hul ouers op Dinsdag, 10 Januarie die geleentheid gekry om hul nuwe klaskamers te aanskou en om die onnies te ontmoet … en, o ja … om hul splinternuwe tasse vir almal te wys.
Lees ook: KYK: Kennies se Knikkie-kleuters oor ‘grootskool’
Vroeg die oggend is die rooi tapyt letterlik vir die paddabeentjies uitgerol. Terwyl hulle met oë vol verwagting in die ry gestaan het om hul heel eerste skoolfoto te neem, het skoolhoof Charles Miller die geleentheid gebruik om elkeen met die hand te groet en verwelkom.
Na ‘n fotosessie saam mamma, pappa en sommer boetie en sussie ook, is die graad 1’s deur die skool se leerlingraad begelei tot by hul nuwe klasse.
Lees ook: : KYK: Van Norienes tot ‘grootskool’
Charles het ook aan die News vertel dat hulle sommer vanjaar ‘n hele paar stelle tweelinge verwelkom het – sewe om presies te wees!
Die News wens elke graadeentjie-paddabeentjie sterkte toe vir grootskool.
