Nories-atlete ryg medaljes in tydens hul Top 15

Hoërskool Noordheuwel se Top 15-atletiekbyeenkoms is ‘n jaarlikse hoogtepunt op die kalender en vanjaar was geen uitsondering nie met 59 skole van regoor die land, en van so ver as Namibië, wat deelgeneem het.

Nories se sporthoof, WP Laidlaw, het gesê hul atlete het uitgeblink in items op die baan en veld.

“Dit is te danke aan ’n ongelooflike personeelkorps en trotse leerders dat die Top 15 jaarliks ??van krag tot krag gaan,” het hy gesê.

WP het bygevoeg daar was twee afdelings van kompetisie. In die eerste afdeling was Hoërskool Menlopark eerste, Nories tweede en Hoërskool Zwartkop derde. In die tweede afdeling was Hoërskool Ben Viljoen eerste gevolg deur Hoërskool Ermelo en Hoërskool Frikkie Meyer.

WP het bygevoeg dat ander plaaslike skole wat deelgeneem het sluit in Hoërskool Monument High School, Krugersdorp High School (KHS), Hoërskool Bastion en Curro Krugersdorp High School.

Nories spog ook met talle podiumplekke, soos volg:

Dogters:
• Milè Olivier het goud ingepalm in die 90m hekkies-item vir dogters o14 met ‘n tyd van 13.41 sekondes
• Hannah Hope Vermaak het ook goud ingepalm in die 100m-item met ‘n tyd van 11.65 sekondes asook goud in die 200m (24.32 sekondes) vir dogters o19
• Liandri Kriel het goud gekry in die 800m vir dogters o16 met ‘n tyd van 02:14.71
• Jamoré Olivier het silwer ontvang in die diskus-item vir dogters o16 en spog met ‘n afstand van 43.76m

Seuns:
• Johan Helberg het silwer gewen in die diskus-item vir seuns o17 en spog met ‘n afstand van 51.60m
• Jaydon Fairlie het twee goue medaljes ingepalm in die 200m en 100m vir seuns o15 met blitsige tye van 22.14 en 11.01 sekondes onderskeidelik