Of dit nou katte en honde reën of iemand ’n bok vir sport is, Laerskool Krugersdorp-Noord het hul taal met trots gevier tydens idiomedag.

Op 12 September het Noordskool-leerders nie in hul gewone skooldrag klas toe gegaan nie, maar eerder as hul gunsteling idiome opgedaag.

Volgens woordvoerder Quintin Botha is die dag aangebied vir die taalvakke om leerders bewus te maak van hoeveel pret tale kan wees.

Leerders moes inskryf en kon enige idioom in hul kleredrag uitbeeld. Hy het bygevoeg dat dit ’n jaarlikse geleentheid is, maar dat vanjaar se idiomedag by verre die grootste was omdat dit as ’n kompetisie onder die leerders aangebied is.

“Daar was sewe wenners – een vir elke graad – en die leerders het ook pryse gewen,” het hy gesê.

“Die hoogtepunt van die dag was die leerders se kreatiwiteit en dat hulle uit hul pad gegaan het. Daar was selfs ’n leerder wat ’n klein bokkie skool toe gebring het,” het hy afgesluit.