Die modder het gespat en die leerders het gegil en gelag tydens Laerskool Kenmare se opwindende kaskarwedren op 2 Oktober – een van die skool se jaarlikse fondsinsamelings in samewerking met Kennies Leef Liefde.

Volgens Kennies se sport-, kultuur- en bemarkingshoof, Peter du Toit, was die dag vol moddergate, pret en samehorigheid, met elke graad wat hul bes gedoen het om nie net te wen nie, maar ook om dit ten volle te geniet.

Leerders van graad RR tot 7 het deelgeneem.

“Dis ’n ongelooflike bederf vir die kinders en die personeel – ’n dag van genot,” het Peter gesê. “Die kinders is absoluut mal daaroor.”

Hy het bygevoeg dat die hoogtepunt van die dag was om te sien hoe elke klas saamwerk om as wenner uit die stryd te tree, en hoe kinders, ouers en onderwysers hulself geniet het.

Leerders het kontantpryse ontvang vir die meeste fondse wat ingesamel is, terwyl die klasse wat die meeste ingesamel het, op uitstappies beloon word.

“Daar is ’n wenner in elke graad, maar ek sou sê die ware wenner van die dag was die genot en die moddergate wat die leerders beleef het,” het hy afgesluit.